26 May 2012

[eo] Ĉu Esperanto estas eŭropa aŭ internacia lingvo?

de Ferdinand Cesarano

Esperanto kiel lingvo estas eŭropa, ĉar ĉiuj el ĝiaj fontlingvoj apartenas al la granda lingva familio eŭropa. Estas eŭropalingvaj ne nur ĝiaj vortoj, sed ankaŭ ĝiaj lingvaj konceptoj (la parolopartoj, la ligoverbo, la gramatika strukturo).

Esperanto havas, aldone al la lingvajn trajtojn eŭropajn, ankaŭ iujn kreaĵojn el la menso de Zamenhof (ekz-e, la plenan tablon de korelativoj; la tute liberan vorto-kreadon). Zamenhof konis la lingvojn sole eŭropajn; tial estas tute hazarda ajna imagata simileco inter tiuj liaj kreaĵoj kaj la trajtoj de iuj lingvoj ekster-eŭropaj. Oni ne citu tiun hazardan similecon por pretendi ke Esperanto havas iujn fontojn ekster-eŭropajn.

Laŭ la konteksto de la Esperanta lingvistiko, "internacia" temas pri la eŭropa lingvaro; kiam la Fundamento priparolas "vorton internacian" (ekz-e, en la 15-a Regulo), ĝi aludas vorton kiu ekzistas en multaj eŭropaj lingvoj - alivorte, en multaj el la Esperantaj fontlingvoj.

Sed el tiu realo oni *neniel* supozu tion, ke Esperanto estas proprietaĵo sole de la eŭropanoj aŭ sole de la eŭropa-lingvanoj. Pro tiu realo pri la nialingva origino, oni neniel negu tion, ke Esperanto estas uzinda fare de ĉiuj homoj.

Esperanto kiel lingvo estas eŭropa; sed Esperanto kiel komunikilo estas tutmonda.